Түркістан облыстық тарихи-өлкетану музейі мен «Отырар» мемлекеттік археологиялық музей-қорығы» бірлесе отырып, «Түркістан облысының тарихи-мәдени ескерткіштерін: зерттеу және сақтау мәселелері» тақырыбында аймақтық семинар өткізді.
«Археологтар» күніне орай ұйымдастырылған шараға М.Әуезов атындағы Оңтүстік Қазақстан университетінің доценті, т.ғ.к. Авизова Айман Қарайдарқызы, Қожа Ахмет Ясауи атындағы Халықаралық Қазақ-Түрік университеті, Археология ғылыми-зерттеу институтының жетекші ғылыми қызметкерлері, PhD докторы, қауымдастырылған профессор Сыздықов Бақдәулет Сапарбекұлы мен Музаффер Гурсой, «Ордабасы» Ұлттық тарихи-мәдени қорығының бөлім меңгерушісі Жұмабек Ташбаевтар қатысты.
Аталған шара аясында Түркістан облыстық тарихи-өлкетану музейінің қызметкері, археолог Ержігітова Айсұлу Асқарқызы «Отырар» музей-қорығы тарапынан қойылған көрмеге көпшілік назарын аударып, ұйымдастырылып отырған шараның мән-маңызына тоқталып өтті.
Облыс көлемінде ұйымдастырылып отырған шарада Музаффер Гурсой «Қаратөбе қорымында 2024 жылы жүргізілген археологиялық зерттеу жұмысының нәтижесі», Отырар музей-қорығы, «Археология» ғылыми-зерттеу бөлімінің кіші ғылыми қызметкері Зияев Мейірхан Нұржанұлы «Отырардың тәуелсіздік жылдарындағы зерттеулері», «Ордабасы» Ұлттық тарихи-мәдени қорығының бөлім меңгерушісі Жұмабек Ташбаевтың «Төлебай обалы қорымындағы зерттеу нәтижелері» тақырыбында дайындаған баяндамаларын оқып, зерттеу нәтижелері мен жеткен жетістіктерін насихаттады.
Шараны қорытындылай келе Түркістан облыстық тарихи-өлкетану музейінің директоры Баян Елеусізқызы шараға қатысушыларды құттықтай отырып, осындай ауқымды шараларды көптеп өткізуді қолға алуды ұсынды.
